13 juin 2009
6
13
/06
/juin
/2009
23:28
بسم الله الرحمان الرحيم
قصيدة للشاعر سيدي احمد الغرابلي بعنوان شكاية إلى رسول الله وتسميتها عند اهل الملحون* الغريبة * لكون هذا النوع من الشعر لم يسبق له ان نظم من قبل ونلاحظ ان الشاعر يشكو من تهاون الأمة وخذلانها اثر دخول الفرنسيين الى المغرب الأقصى في نهاية القرن التاسع عشر وبداية القرن العشرين وبعد موقعة اسلي التي فضحت تراجع القوة العسكرية للمغرب الأقصى الذي كان مهاب الجانب ممن أرادوا استعماره
ولا زمتها
صليوا على العدناي
عين الرحمة نبع لهدى وكنز الإحسان
مول الطبع القرآني
صلى الله عليه دايما كل آن
نستفتح طرز* وزاني *تشبيه القصيد بالثوب المطرز بخيوط الذهب
باسم الجلال والصلا بقلب ولسان
على الحبيب المداني
والرضى والرضوان على آلو لحنان
وسلام الله الغاني
على الخلفا الراشدين طول لحيان
والاصحاب والاعياني
ولي شافوه وصغاو منو ببيان
وبعد. من يصغاني
هذي شكاية للنبي بهذ الزمان
غادي لو بيها عاني
حتى للمسجد الشريف نور لعيان
نقراها لو بلساني
ما بين القبر ومنبرو الحال يزيان
ونقول انور كناني
جيتك شاكي باكي وحاير لدهان
نستغفر للغفار .....سر وجهار ....ليا ولاهل لوزار فالزمان لغرير *
نستغفر كل نهار....يا امام لنصار...هل ينفع استغفارفي الزمان لعسير
فاتو قالوا لبرار....كم استغفار محتاج استغفار حيث الذنب كثير
*هذا المقطع وأشباهه يسمى العروبي وهو يغنى على شكل موال
وانا شفت من أخواني
من شهد بالله وبيك وقالها بلسان
فالتدين مواني
لا صلا فوقتها ولا صيام إتقان
ولاخور ترك بلعيان
ترك شهوة فترك آح انا وكان
والبعض على العصياني
تبعو الهوى وهواوافلملاهي ومان
جيتك من هو كناني
يا محبوب الرحمان ليك شاكي اخوان
بدعو فاللهو الواني
الله يهديهوم بيك حالهوم يزيان
هذا هو المطلوب ....يا طبيب القلوب ....يا لحبيب المحبوب يا حبيب الحبيب
حين تنخرق لحجوب....بين دوك العتوب...ارغب عالم لغيوب ليس يخفاه غيب
هو يعفو ويتوب .....ما يخلي كروب ...ويصرف ما مكتوب لطف بالمغرب
هاهما ذو صبعاني
على الشباك مشبكين نرجا لحسان
هاهو دمع عياني
فوق خدودي هطال كيف هطل لمزان
هاني محموم اناني
هاني نهار اتكوا لمدافي بالمحان
الله انور جفاني
مضيوم جيت مقهور متقل بالاحزان
لا تتركني فهواني
ولا تردني خايب لتراب الاوطان
يا من جانا رحمة...وجا بالمراحمة...احرم هذ الامة الهايمة فالاثام
وطلب لها نسمة ...من المقام الاسمى...تاتيها من ثم. تهب بين لغمام
وتسري من السما..لارضنا ناسما...فالدار وفالخيمةتيقض لنيام
جاهك عند الوحداني
جاه مشرف وعظيم يا سراج العيان
وحنا ولو عصياني
بالله وبيك نشهدو فطول الزمان
ارغب من لا لو ثاني
يتوب على عصاة امتك بالاحسان
يا قرة كل عياني
طلب لينا اربعة تحد هذ الفتان
اثنان بعد الثناني
اربعة يا مالكي الحال يزيان
اربعة من عند الغاني
تغني هذ الامة رجالها ونسوان
هدانا للنجدين ...صح قولو الزين ...واحنا ما مختارين واحد من اثنين
محتاجين للحنين....يا شريق لجبين...للرشد فين وفين باش لهدى يبان
نختارو من النجدين...واحد من اثنين...ويكون طريق الدين والايمان والاحسان
يا مول السر الساني
يا حبيب الحضرة الا تراها عيان
ارغب دايم لحساني
يزودنا بالرشد ما صعاب يليان
قال فضيل فجيراني
راه رشدنا نطالعو حزاب لبيان
ونفهمو كل معاني
فحديث المصطفى وسيرتو كيف كان
قلت رشدنا لبياني
وفقهنا فيه حديث سيد جمع لكوان
لكن احتجنا ثاني
لتاييد الي بيه كاتسير لبدان
يا بحر الجود اراني
راجي لامتك فاوطاني همة وشان
مزازك فالحسناني
وفلا لة الزهرابنتك شمس لكوان
وباسد الشجعاني
علي الزاهد العابد سيد اهل لحسان
وايلا هاب التاييد ....من احسانو يزيد عن التاييد تسديد لا تزلق لعباد
ويتكرم ويزيد... رب غاني مجيد....يعصمنا من المارد ويجعلنا فداد
هادو اربعة فنشيد طلبهم فريد فالمدينة وبعيد عن تراب البلاد
فاس مراحة العياني
فاس المحبوبة فاس من سجات الاذهان
لكن هنا مكواني
ما باقي لي ملجا لغير هذ لمكان
نتضرع لمن نشاني
ونتمرغ فتراب ارض طب الابدان
ونتوسل بلساني
وبقلبي ومهجتي يزول هذ الهوان
على الغرب الجواني
واهلو اهل الايمان غير غفلو ا وكان
يمحي جميع العصياني
ويثوب ويعفو ويسمح جود واحسان
لاجل هذ الربعة جيت ليك نسعى.لا تخيب لي مسعى بجاه هذ البقيع
ولا لها خدعة وجاتني فادعة رفعت شاني رفعة وبان عيبي سريع
انا شر من دعا وساكني ما وعى ولا مني نفعا وظان انا مطيع
هاني عود ثاني
اتيت فالفجر كيف اتاو اهل الايمان
بعد الصلاة تلقاني
ثم فباب جبريل انادي بلسان
ونقول انور كناني
يا روح راحتي يا قرة نور لعيان
جاو القوم الطغياني
لبلادنا وجابو لنا كم من فتان
ظهر فينا الي واني
يبينو الي هدموا فاتنين لذهان
واسمي فختام وزاني
الغرابلي الحاج احمد كان ففاس كان
واليوم فطيبة راني
فيها رغبت فيها زاوكت الله كان
ودعيت بقلبي وكناني
يا من ضغا لها قول آمين تهنى كنان
صليو على العدناني
عين الرحمة نبع الهدى كنز لحسان
مول الطبع القرآني
صلى الله عليه دايما كل آن
Published by الملحون فن إنساني
-
dans
روائع من فن الملحون
13 juin 2009
6
13
/06
/juin
/2009
14:42
الحربة
عذروني يا اهلي ولاش تلوموني هكذا فحالي
سيروا خليوا كل حال يسير على حالو
القسم الأول
أنا الكاوي بكيْ مخفي كيْ فالذات ما برى لي
بعد لاّ كويت وبريت جراحي طالوا
يحياوا حتى يهولوني ونعود نساهر الليالي
جراح الحب والهوى والهجرة لا زالوا
الجراح يهيجوا غرام الغيوان الشاطنات بالي
جراح يهيج يَكْ عادوا للقلب هوالو
بهم مشطون كيف راد وقدّر نعم الغني العالي
السابق لي نصرّْفو والوعد بمجالو
لا زلت ملازم الصبر صبري صبرْ العيس فالليالي
ارفدت حمول الهوى وتكدرت بحمالو
الحربة
القسم الثاني
لاش تلومو هكذا فحالي وأنا بجرايحي نلالي
شاكي باكي من هموم قلبي واهوالو
تارة مول الغرام تايه تارة حالو يعود سالي
ترى يبقى هميم هايم لا ما يزها لو
لغرام طوع السلاطن لاسيما اللي بحالي
ديما غيظان على العاشق ما كَيَرْتَا لو
طوّع كسرى على نصالو وما قاسى مع الهلالي
ومطوع سيف والغلام العبسي وأمثالو
الحربة
القسم الثالث
قل بعض الناس كَيْلوموا ويزيدوا في ملام حالي
قل بعض الناس كيقولوا هذا عمدا لو
هذا حالي مع الهوى متولع مولوع بالغوالي
تروع ساكني ونطق من غير احوالو
وإلى نجبر أهل الفن بحالي يستحسنوا أقوالي
يبكيوا على بكاي ناس الغيوان يسالوا
وإلى نجبر أهل اللوم يلوموا ويبطلوا اشغالي
ويقولوا يا لْطيف راه تكوى تخلالو
لاموني في افعايلي وفْعَلْهم عدا على افعالي
لكن غَدَّا كلها يتحاسب بفعالو
الحربة
القسم الرابع
كم من واحد لامني ومكثر عَجْبي مع اسآلي
يدوي فيَّ كيخفف ذنبي بأقوالو
عارف تحقيق سيرتي ما نبغض إنسان ما نبالي
ما نجَحَّدْ حَدْ ما نغتبو ولا نصغى لو
قابض حَدّي وكنساعف الغرام اللي في ادخالي
نخمم في حكايتو واش يكون فصالو
لولا الغرام ما نخمم ولا نسهى على أشغالي
يبلي من لام فيه ويجرب ما يجرى لو
يذوق الحب غير نوبة ولا يجبر ليه والي
يذوق اغصايصو وسَمُّو وجراح نكالو
الحربة
القسم الرابع
ما يعذر غير من كوى وتجرّح كيفي من العوالي
بنجال اللي بحبهم كاوية عمدالو
ملكوني يا اهلي ولاحُو لي جفني على المالي
ملكوني بالبها وبحسن الخد مع خالو
هما هما راحتي فالدنيا هما راس مالي
أنا بَعْدَ خديم لهم فاش ما قالوا
هما هما اللي سباب بلايا هما دْوا علالي
هما هما..ياك العشيق عليه يسالوا
أرى من لايحبهم ورّيوه ليَ ويا امثالي
يجي حتى يفيدني ونفيدو ونسالو
الحربة
القسم الخامس والأخير من القصيدة
نَهّيت بيات حلتي بسلامي ما فاحت الغوالي
لرْباب الفن حق دهاة العلم ينالوا
طايع لهم في زماني ولْقَحْ غصني زيان حالي
غزلي برْضى همام فالشتا لا لحت خبالو
زرتو ورويت من مدادو وعْمَرْ جبحي وعاد مالي
وكْمَلْ قصدي فاش جاني ذَيّْ اللي قالوا
يا حفاظي روى عليَ ولغي الجحود لا تبالي
اللي جحدك سير خليه فقبح فعالو
اسمي موضوح في حروف أبجد أمن صغى اقوالي
زوج وسبعين زيد سبعة للأسم كمالو
نطلب من لاينام يغفر ذنبي من لا خفاه حالي
يعفو عني ولا يحافيني جل جلالو
Published by الملحون فن إنساني
-
dans
روائع من فن الملحون
13 juin 2009
6
13
/06
/juin
/2009
02:48
عَشْقْ الْجْمالْ طَبْعْ غْريزْ فْ:مَنْهُ الْبيبْ
ديما مْعاهْ نَعْتْ حْبيبُ
كَلْمَسْكْ الدّْكي في جيبُ
مَتْعاهْدَ النَّفْسْ بْطيبُ
وَالْوَلْفْ ريحْ غَلاَّبْ
مَتْروكْ فيهْ لَعْتابْ مولْ الشّْرابْ
يُعْدارْ فْ:حالْ الْغيبَة
دايَعْ بيهْ هْواهْ مَ يْمَيَّزْ داهْ مَنْ دْواهْْ
مَنْ صْرُخْتُ لَحْماكْ قْريبَة
وَمْقامَكْ عَلاَّهْ
حُبّْ غيرُ مَ تَسْتَحْلاهْ
الْحُبّْ فَنْجْلْ رْحيقُ مَ لدُّ للَشّْريبْ
وَللِّي صْفاتْ ليهْ نْشَوْتُ
وَدْرَكْ فَ:الْحْبيبْ شْهَوْتُ
تَبْتَتْ حُجْتُ وَدْعَوْتُ
وللّي مْعَ الرّْضا باتْ
يَنْسا الجّْفا للِّي فاتْ روحُ هْناتْ
ساعَتْ لَقْبولْ وْجيبا
وَالسَّرْ مَنْ كْماهْ
لاَ غْنى شُرْبُ يَصْفى مَاهْ
مَنْ صْرُخْتُ لَحْماكْ قْريبَة
وَمْقامَكْ عَلاَّهْ
حُبّْ غيرُ مَ تَسْتَحْلاهْ
مَغْلوبْ لَلْمْحَبَّة قَلْبْ الْمَرْوْ النّْجيبْ
الْحُبّْ لِهْ كَمَّنْ صِفة
بْدايْتُ شْرارْ عْصيفة
وَنْهايْتُ سْرارْ الْطيفة
مَنْ صَحْبوهْ تَلاَّفْ
وَضْحاوْا بيهْ عُرَّافْ
مْعَ وْصافْ
سَرّْ الدَّعْوى لَمْجيبا
يَلْقى العَبْدْ مْناهْ
وْمَنْ وْقَفْ سَعْدُ غَمّْ عْداهْ
مَنْ صْرُخْتُ لَحْماكْ قْريبَة
وَمْقامَكْ عَلاَّهْ
حُبّْ غيرُ مَ تَسْتَحْلاهْ
بَحْرْ الْهْوى رْكوبُ فيهْ السَّرْ الْعْجيبْ
مْعَ فْراتْنُ وَكْلاَحُ
وَعْواصْفُ وْهَوْلْ رْياحُ
وَزْلاَزْلُ وْ رَعْدْ صْياحُ
يَلْقى بْشيرْ لَفْراحْ
بَغْنايْمُ اِلى راحْ
بابْ الصّْلاحْ
مَنْ دونُ كُلّْ غْريبة
يَلْقاها مَنْ جاهْ
وْمَنْ بْلَغْ قَصْدُ نالْ مْناهْ
مَنْ صْرُخْتُ لَحْماكْ قْريبَة
وَمْقامَكْ عَلاَّهْ
حُبّْ غيرُ مَ تَسْتَحْلاهْ
زْوابْعْ الْهْوى فيها الْهَيَّنْ وَ الصّْعيبْ
مَنْهُمْ مَنْ يْجي بَكْروبُ
وَوْساوْسُ وْعَجْبْ خْطوبُ
يَبْلي النّْفوسْ بَعْدْ يْتوبُ
مَنْهُمْ سَهْلْ مَرْطوبْ
ياتي فْ: زَيّْ مَحْبوبْ
يَطْفي شْهوبْ
كانَتْ فَالصّْدَرْ لْهيبا
وِيرَقي مَعْناهْ
حَتَّى تْشاهَدْ تَصْديقْ مْناهْ
مَنْ صْرُخْتُ لَحْماكْ قْريبَة
وَمْقامَكْ عَلاَّهْ
حُبّْ غيرُ مَ تَسْتَحْلاهْ
الْهْوى للِّي فْتَنِّي شَوْقُ نَوْعُ غْريبْ
هْلالْ دارتُ بَسْناها
فَقْلوبْ هَلْ الْحالْ ضْياها
مَرْمودْ الْبْصَرْ مَ راها
ياقوتْ لاَمْعْ شْعاهْ
مَنْ فَازْ بِهْ وَدَّاهْ
صانُ حْضاهْ
وَزْهَدْ في كُلّْ كْسيبا
وَالصّادَقْ فَهْواهْ
كُلّْ ما يَتْمَنَّى يَلْقاهْ
مَنْ صْرُخْتُ لَحْماكْ قْريبَة
وَمْقامَكْ عَلاَّهْ
حُبّْ غيرُ مَ تَسْتَحْلاهْ
تَدْعي الْحُبّْ وَتْحافي بَصْدودْ الْحْبيبْ
يَسَعْدْ مَنْ عْليكْ تْوَلاَّ
لُ: كَانْ مُرّْ عَنْدَكْ يَحْلاَ
ليسْ الْحْبيبْ عَنْدُ زَلاَّ
مَنْ ليهْ حابْكْ الْحالْ
طيعُ فْ: كُلّْ مَّ قالْ
زَكِّي فْعالْ
مَنْ نَفْسَكْ بِهْ شْغيبا
وَعْلاجَكْ فَرْضاهْ
كُنْ لُ عَنْدْ اَمْرُ وَنْهاهْ
مَنْ صْرُخْتُ لَحْماكْ قْريبَة
وَمْقامَكْ عَلاَّهْ
حُبّْ غيرُ مَ تَسْتَحْلاهْ
فاضي الْمْزاجْ مَ يَدِّي خُبْرْ وْلا يْجيبْ
عَزّْ السّْلوعْ عَنْدْ غْلاها
وْ تَهْوانْها يَّامْ رْخاها
وِيسَاوَمْ الْهْمَجْ مَشْراها
مَنْ كانْ جايَرْ ضْماهْ
وَالْقى الْحْبيبْ وَسْقاهْ
لَوْلا ضْماهْ
ما يَعْرفْ لَلْما طيبا وْمَنْ جَرْيُ عَيَّاهْ
غيرْ يَرْكَبْ يَخْلَفْ شْقاهْ
مَنْ صْرُخْتُ لَحْماكْ قْريبَة
وَمْقامَكْ عَلاَّهْ
حُبّْ غيرُ مَ تَسْتَحْلاهْ
تيهْ الْمْليحْ كالسَّقْوَا لَلرًّوضْ الْخْصيبْ
تَدْفَعْ بَاللّْقاحْ شْجارُ
وَتْفوحْ بالنّْسومْ زْهارُ
وَتْهيجْ لَنْشيدْ طْيارُ
لَوْلا غْزالْ لَقْفارْ
طَبْعُ شْرودْ حَدَّارْ
لُو كان بَارّْ
وَ الرَّخْصْ عْليهْ مْعيبا
والزِّينْ اِلى تاهْ يْلَدْ عَشْقُ وِ يْطيبْ هْواهْ
مَنْ صْرُخْتُ لَحْماكْ قْريبَة
وَمْقامَكْ عَلاَّهْ
حُبّْ غيرُ مَ تَسْتَحْلاهْ
طَفْحْ الشّْبابْ فَالْعاشَقْ وَعْدارُ مْشيبْ
لَمَّاحْلاَتْ نَشْوَتْ شَرْبُ
وَسْراتْ في دْواخلْ قَلْبُ
شَيْبُ غْبا فْسَطْوتْ حُبُّ
مَهْمى حْبا عْلَ الْبابْ
وَرْفَعْ ليهْ لَحْجابْ
لْقى جْوابْ
طَيَّبْ بَلْفاظْ صْويبا لَوْ كَتْمُ وَخْفاهْ
كَعْطَرْ يَعْبَقْ طيبْ شْداهْ
مَنْ صْرُخْتُ لَحْماكْ قْريبَة
وَمْقامَكْ عَلاَّهْ
حُبّْ غيرُ مَ تَسْتَحْلاهْ
مَنْ لاَزَمْ الرّْضى وَطْلَبْ لاَ بَدُّ يْصيبْ
وَللِّي بْعَ يْغيضْ حْسودُ
يَتْبَعْ بَلْمْهَلْ مَقْصودُ
حَتَّى يَنْكْمَلْ مَعْدودُ
مَ نالْ حَدّْ مَ رادْ
اِلاَّ بْتَعْبْ وَطْرادْ
صَوْتْ الرّْعادْ
يَتْرَكْ لَقْلوبْ رْهِيبا
بَعْدْ هْديرْ الْغاهْ
يَنْبَشَرْ بَالْغَيْثْ مْنْ وِْ راهْ
مَنْ صْرُخْتُ لَحْماكْ قْريبَة
وَمْقامَكْ عَلاَّهْ
حُبّْ غيرُ مَ تَسْتَحْلاهْ
عَزّْ السّْلوعْ يَرْبَحْ تاجَرْها مَ يْخيبْ
مَنْ ساكْنُ الْبيبْ وْ عُدْري
يَفْهَمْ مَ حْكيتْ فْشِعْري
خلاف مَنْ غْشيمْ وْغُرِّي
يَدْري نْفيسْ لَدْرارْ
ماهَرْ فْصيحْ لَشْعارْ
صافي لَعْيارْ
باري مَنْ كُلْ مْعيبَ
سرْ العَبْدْ وْفاهْ
مَنْ فَضلْ مولاها سْتَوْفاهْ
مَنْ صْرُخْتُ لَحْماكْ قْريبَة
وَمْقامَكْ عَلاَّهْ حُبّْ
غيرُ مَ تَسْتَحْلاه
Published by Said El Meftahi
-
dans
روائع من فن الملحون
13 juin 2009
6
13
/06
/juin
/2009
02:44
طال تهانك يا محبوبي خاف من الله
واش لحبيب يدوز حبيبو يرجع ليه طليب
قال يانا سيدي عمري منويت خيالك عني يغيب
بعد لموالفة و شروط الصحبة برموك صحاب الغتبة
علاش طولتي ذا الغيبة يالجافي خاف من ذنوبي
جرح قلبي هواك جرح لا صرت طبيبو عشق الزين صعيب
قال يانا سيدي ترى تصبني متسلي ترى نغيب
ترى تصيب حالي مثل المجدوب بالهوى هايم غير اللوب
والعقل بغرامك مسلوب كل يوم نصرف مكتوبي
صابر لو عدت قصتي عالجبال يريبو والشبان تشيب
قال يانا سيدي والى تزور رسمي نتسلا في قريب
معاك الزهو باغي نسطابو هاتلي كاسي بشرابو
احسودنا بالجملة غابو على وصولك يفجاو كروبي
يا الهاجرني بغير سبا فغرض ارقيبو ليك الله حسيب
قال يانا سيدي نارك يالجافي لهبت قلبي لهيب
اهل لغرام مثلي ما يعابو كل زين بحق احرابو
عاشقو نخدم فركابو بعد يغلب يرجع مغلوبي
و الى نغلبت ياك جرحي لمليح طبيبو عمري ليه نهيب
قال يانا سيدي جرح لمليح ما ينفع فعلاجو طبيب
غير الى تداوى بدوا المحبوب والوصول علاج للقلوب
للذي بغرامك مسلوب نهار يوفى ليا مرغوبي
يظهر رسمي من جمالك من بعد حجيبو يه الله رقيب
قال يانا سيدي انت مع احبابك سالي وانا غريب
جعلت فيك ميلافي و احبابي دايرك واحد فصحابي
ضاع ليي بالهجر خطابي بك كنت نشالي فحروبي
ظنيت الخير في امثالك ونويت نصيبو ورجع لي بالعيب
قال يانا سيدي و ما مدحت في جمالك باللفظ العجيب
وما رغبت بلساني من طلبة ياك تسخر لي لمحبة
معاك ما نفعتني كتبة عييت نكتب و نسيت كتوبي
و الكاتب لي نصرفو صابر عن تعذيبو فرج الله قريب
قال يانا سيدي وانا عليك قلبي صافي مثل الحليب
وانت القلب لكحل سود غرابي بعد حجبتك فحجابي
على الغدر صبتك رابي قالت اهل الشعر الموهوبي
الغدار يموت بالغدر دغيا يظهر عيبو واللي دار يصيب
قال يانا سيدي وعييت ليك ندمم ودموعي سكيب
ولا شفقت من حالي و عذابي ولا عرفت اش كان سبابي
معاك يا مصباح هدابي فرغ صبري و قوات عجوبي
و ظهر للحاسدين سري من بعد حجيبو يالبدر المجيد
قال يانا سيدي واليوم درت تكلاني فالله المجيد
جيد ما يخيب ليا مرغوب ربنا يغفر لي و نتوب
دخيل لو باللوح المكتوب * نهار يوفى ليا محسوبي
يجعل قبري رياض فجنان الخلد نصيبو فجوار الحبيب
قال يانا سيدي وانا نويت بعد وصولك سعدي يطيب
واليوم من جفاك عضايا شابو قوسك رما لي نشابو
والرضى سديتي بابو الى وفى لي نغني مرغوبي
قلبي بسوايع الزهو يتباشر بنصيبو فجمالك العجيب
شمس لفلاك ضوات حجوبي وتجلى نورها
على البيدا بعد حجيبو من برج التهذيب
من خيول الصحرا مركوبي بازي في الجو
الى يصرصر لطيار تهيبو يخمد فرخ الذيب
يالحافظ حلة موهوبي هاك الياقوت
موثق من جوهر ترتيبو من ماهر و لبيب
صول بقوافيا وازروبي والجاحدني
درهمو يكشف من تشبيبو بوجادي وصليب
مايقد يجاوب بعروبي وسلامي للشياخ
في كل نهار لهيبو قد امطار سكيب
يالجواد ليك هروبي ترحم عبدك
مبارك السوسي وستر عيبو يا علام الغيب
Published by Said El Meftahi
-
dans
روائع من فن الملحون
13 juin 2009
6
13
/06
/juin
/2009
02:36
محبوب القلب زارني يامس يا عشراني
واصلني لرصام نكى جمع الرقبـــــــــان
صايل ما بين قرانو سيدي بو وجنة منكطة
هاد مدة شحال وانا بالهجرة فانــــــــــي
حتى ولى بالصــــدود لونـي مثل اليرقان
والطرف اجفاه وسانو ورقتي بالحب ساقطة
نتفكر كل يوم بدرو وبهاه الســـــــــــــاني
ونبات ابو حشو اهميم نرتي مثل الورشان
والقلب قوات محانوا وخلاكي بالشوف لاهطا
ما يعدرني فحالتي وهواي او غيوانـــــــي
غير الى ملسوع بالغـــــــرام او هوا لحسان
الله يحسن عوانوا قاس سهم البن ما خطا
لا زمت الصبر مـــــــــا كفا وخفيت فكناني
حتى جا الدهر بزهو و كـــــــــــمال السلوان
ورخال الوقت عنانوا ويامي ولات ناشطة
بو جود لي هويت يوم واصلني لمكانـــــــي
من غير انوى قصر فلجفى والتيــــــــــــهان
جاد علي بحسانوا ونعملي من بعدها بطا
قسم البارح زارني حبــي وحيا رصمي امع قلبــــــي فرصا فلحا سد ارقيب
طيب يحيي اشده طيبي ما متل فالورى حببـــــــــي شملالي قامت الرطـيب
ونطى بزيارت نحبي ورجع بعد الجفا قريبــــي وضفرت بغايت النصيب
يا من سعدو يوم جا لباب الرصم وندانـــــــي
مهما نقر الباب نضت من غير عقل عجـــلان
كني طير بجنحانوا وفتحت النقشا الاهطا
نوجد ولفي علاج داتي واقف يرعانـــــــــــي
واقف فتباب الحـــــــــــرير مختلفة على اللوان
يتبختر في روانوا وردات حرير مشرطة
بايعت وقلت ليه ايا مصــــــــــــــــــباح عياني
بيك اهلا وميات مرحبــــــــــــــــا يا دبل لعيان
حبك راني فسجانو ورياحو عني مسلطا
زاد البساط من بغيت وكداك بغانــــــــــــــــــي
وجلس قدامي وهدر نكابو غصن البـــــــــــــان
بدر سطع بين مزانوا وخلاك ماهي مفرطا
حضرت اوان الزهو وبغيتو وبغانــــــــــــــــي
وغنمنا ليلة لي يدركها عاشـــــــــــــــق فزمان
بوجود قدام خدانوا روحي فجمال مربطة
مزين الزين حين يعطف والسعد معاه حين يوقف
ديك البغيا على لوفا
لكن ورد الخدود تقطف لاين سود النجـال يــــــعرف
عشقي فبهاه بالصفا
لا زلت ولا نزول نوصف حسن وعلى لوصال نوصف
حتى وحد فالبدور من غيروا ما يهوانــــــــــــــي
لا ينوا دوقي افلافسي وظريف و حســــــــــــــان
محلا عني تيهانوا ويضوي رصمي الى وطا
عوض هيهات ما اخطر فالغرب الجوانـــــــــــي
ولا فالبهجة القــــــــــاهرة ولا فاليمن
والغرب او حوزار كانوا ولا فديري و مالطا
قد نحييه فالمثل كـــــــــــابند العثماني
ولى راية امشهرا مابين الشــــــــــجعان
اسلبو عقلي حجبانوا وعيون سردا لمعربطا
وخدود الورد كيفتن فلون القانـــــــــــي
فاق جلنار وشكرنط او بالعمــــــــــــــان
والغنجور فتبيانوا كابرني حوم على لكطا
ولمبسم خاتم الدهب والعتنون اســـــباني
من تحت لغبا الجيد فايق جيد الوسنـــــــــان
راتع فحراج وطانوا غادي بين جبال والوطا
ينفر سود النجال مني ولا باغي يروف عني
ولفي سلطان كل زين
حبو يا لايم سكني بصوارم امقلتلو طعني
زين الغرة مع الجبين
وانا بمحبتو معني لاكني خاب فيه ظني
لو صبت نراه كل حيــــــــــن
من بعدن كان لي موالف والعهد اعطــــاني
عهد وثيق لا ينصرفعمر يا الخوان
وقسم ولفي بيمانوا
من رسمي هيهات لا خطـا
وفرح قلبي كثير واركبت علــى شيهاني
شيهان لا نظرت عوض مثل للــــــــئان
وحليبو بين سنانوا
باقي بلوبرى امزكطا
والسرج عليه دالموبر باهي يرضـــــاني
وركب من خالص الذهب ولجــام او عقيلان
مترقم بلبلسيانو
والدير وشهرة امعلطا
وتقلدت ابصارم الوغى لا واحد يلقانـــــي
من لامة الحسود والعدى فنهار المــــيدان
الى حضرو شجعانوا
من ضربي تبقى مسهطا
نشبه فالحب قيس وبن سهل وبن هانــــــي
ونودي بشجاعتي اعلى الضــــــــاهر والغضبان
وقتي نداه زمانوا
ما الزين الوارى الى عطا
اختصرت وصاف زين ولفي ماينتهى في ابهاه وصفي
محبوبي باهي لحروف
حسنوا شلا نطيق نخفي لكن بولاعتي وعرفــــــــي
جبت معانيه بالحروف
ونمتع في بهاه طرفي وبعدها بقيت منفي
واغزالي ما بغا يروف
كانسترعى عليه ونطيعو طول زمـــــــــــــاني
واغدر في كامل البها ونكرلي لحســــــــــــــان
شفا في عديانو وكواني كي ملفطا
احافض ماياتي تهلا فرموز وزانـــــــــــــــــي
وتأدب لضراغم اللغا شــــــــــــــــياب وشيبان
اهل القول وميزاني
ناس لا يرضاو فاللطا
سلام الله عنهم فقلبي ولســــــــــ ــاني
ما فاح الورد والزهر ونسيم السوســـــــــــــان
ونفسخ بين اغصانوا ونعايم ربي الباسطا
والداعي مايلو مزية ديمــــــــــــــــــــــا مدياني
الى يخرج للمشاليا نسقيه القطـــــــــــــــــــــران
لني جنجار عيانو
يعرفني فمرمتي اسطا
وذكر اسمي الحاج فضول حبر لمعـــــــــــــاني
ارجاي فمن لا ينام يختملي بالامـــــــــــــــــــــان
اعلى اليسلام بحسان
يمحي عنا سار الخطا
Published by Said El Meftahi
-
dans
روائع من فن الملحون
13 juin 2009
6
13
/06
/juin
/2009
02:33
خبرني يا مرسول**عن سراج عياني واش من نهار**نظفر بوصالو
عراض الزين الله ***ناصرو من هو مزيان
أنا الفاني وأنا لهميم**أنا الملسوع بليعت** لغرام وتنكالو
أنا اللي سري باح***للورى من بعد الكتمان
أنا العاشق وأنا السقيم**وأناللي جرحني البين**بسنون مصالو
أنا الصب المملوك**/واللي مالكني سلطان
بغرامو تيهني**هزني وخرب ديواني**حاز قلبي ودخالو
وتصرف بحكامو***فمهجتي والذات ولكنان
ليه رسلت رسولي**على وعسى يبلغ قصدي مناه**ويتوك هلالو
ويسليني بعد لفراق***كيف تسليت زمان
قاولني مرسولي**يحضرو ومسكت بالعهد لوثيق**وحصرت مقالو
من البهجة لمدينة***لحضر صيفتو عجلان
مشى ورجع لي بعد حين**ونويتو جابو كيف قال**وافى بقوالو
نصيبو ولى لي فريد***وعلاش مشى ما بان
مهما سلمت عليه**طاش عقلي وخرجت عل الاحوال**ودموعي سالو
أول فكلامي قلت ليه***واين ذابل لعيان
الحربة أو اللازمة
أمرسولي بالله صبري***هذا شحال وأنا فاني ميسور
ميسور البين وطال يسري***مليوح في بلاد بعيدة مهجور
والهاجرني ما جاب خبري***ما خفت غير نمضى من قبل يزور
أمرسولي من يوم**فاش صديتي وانا نرجى**رجوعك بوصالو
ونأنس قلبي بالرضى***عسى يهنا فالأمان
أمرسولي مالي نراك**دون المالك عقلي**اللي سلبني بجمالو
وتركني دون غراض***خارج حساسي عل لوطان
ياك أمرسولي قلت**ما تولي حتى ياتي معاك**ضد فعذالو
ونا نسخى ببشارتي***نهار تجيب المزيان
أمرسولي وين لحبيب**وين الباهي وين اللي**شتاقيت خيالو
وفرقت رسامي ولوطان***وحبابي والعشران
أمرسولي لله**فيدني وخبرني عن سيرتو**حالو واحوالو
سالي ولا كيفي هميم***شاكي باكي نكدان
الحربة
قال المرسول أعاشق الزين***الصبر لا غنى والصاعب يهوان
محبوبك دارت به ليدين***لا ريب حرزوه عليك العديان
لكن من فقدك ناح لحزين***نواح فالضيا عقاب الديجان
محبوبك واصلتو**لمنزلو بكتابك وارفع**ملتقاه بتقبالو
وقراه وحق شواهدو***ودمع نجالو هتان
قال حبيبي محال **ينترك من بالي وانا**ماتركني من بالو
حاشى حتى نرضى***نمحنو مايستهل لمحان
غير الوعد فرقنا**هكذا قدر مولانا**كل وعد بميجالو
وايام الهجرة لا غنى***تعود سرور وسلوان
قل لو يمهل عني**عسى نصيب نغفل لحسود**أو مني يمضالو
ونجيوا نغنمو ساعة***الزهو برشيف الكيسان
ذاتي وبها حسني**صورتي وجمالي والروح**والأعضا مكسوبة لو
إلى دزتو ما دمت***فالحيا يحسبني خوان
جاوبت رسولي قلت ليه**خفت أيام الهجرا**على حبيبي يطوالو
عندي ساعة في عوض يوم***ويوم في عوض زمان
الحربة
أمرسولي لجفا قهرني***فرقت من هويت وخاب المظنون
اش يصبرني عن ضو عيني***الجوهر النفيس الذر المكنون
من يوم خيالو غاب عني***خذني هواه تحت حكامو مسجون
آش نهو حال اللي جفاه**محبوبو وخلا مرسمو** وصادف تنكالو
وشفاتو عذالو***عاد خفضة من بعد الشان
مهما يغشاه النوم**كايشاهد وجه المحبوب**واقف خيال قبالو
ولا جالس ولا معنقو***وضميرو فرحان
تم ينفزع ويفيق**من منامو يوجد روحو فريد**وينهزم حالو
ويرد الحر عل لبكا***ليه يجاوب لمكان
هذا حال اللي هاجرو**وليفو فالغيظ ولا بغى** يصفي تخبالو
عساك أنا مهجور***دون غيظ وفارق لوطان
موت العاشق لغريم**خير لو من لحياة إلى يكون**فارق شملالو
ومياه السبع بحور***ليس تطفي نار الغيوان
دوا مرسولي قال**هكذا سيرة اهل لغرام**عنهم شد حبالو
قليل اللي فيهم***توجدو فكمال السلوان
والصبر يفادة يا عشيق**وقفال بواب الحب**لو صعابو يسهالو
والشدة بالرخفة***بدالها فضل من الرحمان
قلت يا مرسولي خفت**غير لا يكبر لجفا بينا**بطولت ميجالو
أو يبدلني بالحسود***ويعودو لو صدقان
الحربة
أمرسولي نيران حبي***بين الضلوع وقدت كم من شهاب
من حر لظاها ذاب قلبي***وتبات دمعتي كالمطر الصباب
وتقوى بين الناس عجبي***وفقدت راحتي فالضي وغيهاب
أمرسولي لعشيق**لو رشف شهد الورد الفايز**لمختم بمصالو
ويكون حبيبو فارقو***يجيه جرع من قطران
أمرسولي لعشيق**لو مسك مال الدنيا بالجميع**جزا لبدالو
ما يقبل تبدال لحبيب***بالمال ولا لبدان
أمرسولي نتفكر**لبها وخدودو ونواجلو**وقدو وكمالو
ويضيق المنهاج لوسيع***بيا في كل أوان
جرى لي شلا ما جرى**لقيس المجنون ونظن**طاق حالي عن حالو
وأبا نواس وكسرى**وابن هاني والجران
لا أنا باهلي وعشاري**لاانا بحبيبي فالهنا**مع ما يزهالو
مثلي طير بلا فركَ***نعطب من ريش الجنحان
بكى مرسولي عن بكاي**وتمزق مير أعضاه**من كلامي وشجالو
وطلب مني لمسامحة***وودعتو فالأمان
الحربة
بارت لحيال وباد صبري***واهل لهوى يعرفو حالي يعذار
وينصفو لهوايا العذري***وشواهد لمعاني تعطي لخبار
من حر الشوق نظمت شعري***الذات فانية ودموعي مدرار
وسلامي لاهل الحال**الدهاة أهل الرمز العارفين**منهج فصالو
بنسيم الياس وياسمين***والنسري والسوسان
من حبر أديب لبيب** في بحور المعنى جوال**زي من قبلي جالو
رايس ماهر ذوقي لبيب***قاري كم من بيبان
واسمي خمسين وجيم**في حروف أبجد..الغرابلي**قل للي سالو
من بهجة فاس اللي***عزها الكريم المنان
أنا الكاوي من فقدها**وفقد احبابي ثبت**في اعضايا مشعالو
وفراق الزين اصعب***من فراق الأهل ولخوان
Published by Said El Meftahi
-
dans
روائع من فن الملحون
13 juin 2009
6
13
/06
/juin
/2009
02:30
سبحان من اقضى و احكم وعلم الإنسان مالم يعلم .
قصيدة التوسل : من نظم الوالي الصالح سيدي عبد القادر العلمي .
الازمة : (الحربة)
يــامن ابلاني ايعـافيني ارحمتك الـنال خف حملي يتسرح يرتخى اعكـالـي
المقطع الأول : (القسم الأول)
يالواجد بالصرخة عن الضيقة الحــال جل مولانا عن شبه المـثـال عــالـي
غيثـنـي يتفــاج كربـي انـلوح الهـوال خــاطري يتهنى قلبـي ايعود سالــي
لين يركن من بـارتـلـو اجميع لحــوال عـاد منزل ديـوانـو بـالكدار مــالـــي
ادخيلك يــــاربــي بلأنبيـــا ولرســــال ادخيلك يــاسيدي بضريــح كل والي
ادخيلك بالسدات الصالحين الفــضــال كــافــا القطـاب أولجراس ولبدالـــي
الازمة : (الحربة)
يــامن ابلاني ايعـافيني ارحمتك الـنال خف حملي يتسرح يرتخـى اعكـاــي
المقطع الثاني (القسم الثاني)
هل يــــا مظـــرى اهمــوم قلبـــي تتســــلا مهمـــا يتظركـــو وجــاعــي ويزولــــو
مـــاتبقـــى تـــاكبـــا علــى قلبــي دبـــــــلا والقصد اللـــي اطلبت نظفر بوصــولــو
نتيقـــظ لســـرور مــن نــوم الـــغفــــــــلا لآحــاسد لارقيب نخشـــى من قــولــــو
نحمـــد رب السمـــا ونسجـــد للقبـــــــــلا ونقــول اليـــوم عــاد صــادفت اقبولـــو
عــــانتــنــي قولــي وصـارخنــي حــولــو
مــانـتــاشــي غـايب نرجـاك يـالجليـــــــل ومنتـــاشــي عــاجز تعظــار يــالمـــولا
قريب حــاضر ناظر معطى احسانك اجليل اتقد تـشـفــي مـنـدات العـبـد كــل عـــلا
الــبـدان اظعيفــى والحمل جـــاير اثقيــــل والخـــلايق مــاتعضر حــال من التبـــلا
إلا اشكــى العبد علــى سيدو ايزيد يقبــال ايحـررو ويديرو فمـــراثب المعـــالـــي
بــاب ليجــاب عـنـدك مــا اتسـد بقــفــــال امخــــازنك مفتوحــا السـاعـي ابحاـلي
الازمة : (الحربة)
يــامن ابلاني ايعـافيني ارحمتك الـنال خف حملي يتسرح يرتخى اعكالـي
المقطع الثالث : (القسم الثالث)
مــــالــي قــوى ولا ايلــي جهد ولا حــــول ولا تدبيــر فــالــقضـــــى ولاحيــــــلا
مـن أمـــرنـــــي بصبــــــر والــتــــوكـــول هو يفجـــي اهمــوم داتــي الوحيــــلا
منــــي يــانــا الدعــي ومن عندك القبـــول والحــاجــة مــا اتكــون فيهــا تعطيلا
والله إمـــــــابــديــت هــذ الـتــــوســــــــــل حتــى يـقـنــت من اقـدرتك لجليـــــلا
تعطيــــنــي مــا اطلبت فــي هذ الليــــلا
حـق قلتـــي يــاربــي للنبــي المرســــــول من ادعــــالك فعبيدك حــق تستجبـــلـو
كيف يدعــي عبدك ويخيب يــــالمســـؤول ياسريع المعطى لجميــع من اطلبـــــلـو
آمرك بيــن الكــــاف ونــون حق مفعــــول من اتحقق يدهل ويغيب لــيه عقـلــــــو
يـــالـمـعــروف بــالـبقــى والـدوام لـــــزال يالبصير ابعين اللطف شــــوف حــالــي
يــالمـوصـوف بــالوفـا والصفــا ولكـمـــال بيك لـيك اســألتك عنـي اقـبل اسألــــــي
الازمة : (الحربة)
يــامن ابل ني ايعـافيني ارحمتك الـنال خف حملي يتسرح يرتخى اعكـالـي
المقطع الرابع : (القسم الرابع)
معطـــاك المــن اسعــاك يــانعم الجليـــــــل مــاينقص من اخزينك الكـنـز الـمــالـــي
إلا تبغـــي بـحـكـمـتـك تشفــــي لعلـيـــــــــل ويلا تبغــي الفـقـيـر يـرجع دومــــــالــي
إلا تبغـــــي لوضيــــع يدنــــا التفضيــــــــل ترفـــع جــاه ايكــون فــي مـنـزل عـالي
إلا تبغـــــي الشقــــــي اتسـعــدو يــاجلـيــل تسمحـلــو فــالجرام واتجعـلـــو والــــي
بـعـفــوك اتجـــود عل العصــات ابحــالــي
يــاايـــلاه اســألــتـك بجــاه حـق جـبـريــــل وملايكت العرش واهل الـسمــا العــالــي
بـجـــاه عـزريـــل وميـكــائيـل ويسرافيــــل كل مــاأنـطـلـبـلـك فـالحيــن ينعطــــالــي
بجــاه حـرمـت عـبـدك إبراهيـــم لخـلـيــــل حــاجتــي نبغيهـــا بــالعــزم تنقضــالـــي
والنـشـر عـن داتـــي حـلـة ابـسـر ـلجــلال خلف ومـامــي ويمينــــي امـع اشمــالــي
يعيش عبدك فـالراحة مــا ايشــوف تنكـال نغتــنـم شهـوة مقصــــودي إيـلا اوفـالـي
الازمة : (الحربة)
يــامن ابلاني ايعـافيني ارحمتك الـنال خف حملي يتسرح يرتخى اعكـالــي
المقطع الخامس: (القسم الخامس)
يــامـن فـيـك الــرجــــا واعلـيـك الـتـيكـــال لاتــولـجـنـــي الـيـد مـن لا يـــرتـــــالــــي
أنـت تــعـلـم ســـــر قـــلـبـــي يـــامــتعــــال لايــن غــيـرك مــانـديــــرو فــي بــالــــي
مـهـمــا يغتــاظ ســاكنـي ويضيق الـحـــــال نـســـــأل ولا يـغـيـب عـنـك ســـــؤالـــــي
فــــالبـخـــــاري احديـث نـبــــي الله قــــــال الـمـصـطـفـــى الشفيـــع خـــاثم الرسالــي
جــــلال مـــاينطلب مــــــولاي العـــــالـــــي
مـنــاتـحـقـق بــــان الله حـــاكــم وكيــــــــل بعد مــا تدلــــع بيــه اجهــالتــو أيــولـــي
مــا افجـــودو شــك ولا فــي اعطـاه تبديــل حـن مـن والـدي فيــــا وســـأيــر اهلـــــي
من انشاني وخلق جسمي اضعيف ونحـيــل ايعينــــي ويـزيـن بـيـن العـبـــاد حــالــــي
يــا من اخـلق جسدي من اثــراب صلصــال دار فيـــه الــروح ونــور الـعـقـل اهدالــي
الـســتـر والـبـركـــة فــــالـبـدان والـمـــــال والرضــى والــرحمــة وعفوك عن ازلالي
الازمة : (الحربة)
يــامن ابلاني ايعـافيني ارحمتك الـنال خف حملي يتسرح يرتخى اعكـالــي
المقطع السادس : (القسم السادس)
يـــامـن هو اعـلـــى الخـــلايـــــق متجلـــي حـــاظـر نــاظــر مـــا خـفــاتـك ليحـــــالا
لاتـنــظـر يــا احليـــم لـقـبــــايــح فـعـلـــــي ونظر من ضيقـتــي ومـن ضعـف الحـــالا
فاش جـاتك طـاعتــي ولا ضـرك جهـلــــــي لـنــك غـفـــار مـــا تـحـــافــــي بـضـــلالا
اصـــلــح ديــنــي ودنيتــي وقبـل سألـــي وكتب أسمـــي مـع ازمــــام الفــــوظــــــالا
نــاخـد مـيـمــــا اخــدو ارجــــال البـــودالا
واحد علــى بيعـو وعلــى اشــراه عــوال واحد امسـلــي ومزهــي ابـراس مــالـــــو
واحد علــى كسبو وعلـى الأصـول عمـال واحد امـعــول فــالدنيــا علــى امــوالـــــو
واحد ايقـيــل يخـدم مـــا أيـكـل بـشـغــــال هكــذاك جنس بنـــادم كلهـــا وحـــالـــــــو
وعبدك الضعيف المخصوص ناحل الحال اعـلـيـك تـكـلــو يــانـعـم المـالك الجلالـــي
يــامن استر مــافـات ستر شــأيـن مــزال بـقـدرتـك يــا والـــي مـن لا ليــه والـــــي
الازمة : (الحربة)
يــامن ابلاني ايعـافيني ارحمتك الـنال خف حملي يتسرح يرتخى اعكـالــي
المقطع السابع (القسم السابع)
إلا تـطـلـب اطـلب الــرب ألا يـبـخــــــــــــل جـيـد لـمـن اعــطــى ابــوابــو محــلـــولا
مـــا عـز عـلــــى الـكـــريـم أللـي يتوســـل لايـن اكثيــر الـدعــــا ادعـوتــو مقبــــولا
مـن لا يسهـــى ولا أيـنـــام ولا يـغـفــــــــل لبسـنـــي مـن ارضـــاه حـلــة مـكــمـــولا
وعـطــانــي كـامـل العطـــى حكمة وعقـــل ورفــع قـدري ولا امـنـعـنـي مـن صــــولا
وبـقـــــات الجــاحـديـن فـيـــا مـدهــــولا
الازمة : (الحربة)
يــامن ابلاني ايعـافيني ارحمتك الـنال خف حملي يتسرح يرتخى اعكـالــي
المقطع الخامس (القسم الخامس)
انتهت القصيدة بحمد الله
سعيد المفتاحي مونت لافيل
فرنسا
Published by Said El Meftahi
-
dans
روائع من فن الملحون
13 juin 2009
6
13
/06
/juin
/2009
02:28
ارحمي يا راحة العقل ترحامي .. من جفاك طال سقامي
كيف نبقى حاير وانت مسليه ..روفي يا لغزال فاطمة
***
امولاتي والحب والهوى والعشق ونار الغرام
من حالت الصبا في عضايا قاموا ، كل واحد دار مقامو
في مهجتي وضحى بحسامو مع سهامو
يطعن ويزيد بالجراح عدامي في غراد هذ الدامي
غير ملكت عقلي بجمالها وغلقت عنوة باب المراحمة
***
امولاتي ما كان هكذا ظني يا بنت الكرام
تعذبي بغير سباب غلامك....بعدما اقبلت قدامك
بالقهر رعيت ذمامك من غرامك
ضاعت بجفاك الطويل ايامي...يا غرايبي وهيامي
لاش عاقبتني بالظلم بعدما طعتك وانت الظالمة
***
امولاتي شوفي بعين المحنة في هذ الغلام
افاطمة انت بالحال سليمة وحالتي بجفاك سقيمة
كيف نبقى منسي ديما بلا جريمة
واش انت اليوم سمعك صامي .....جاوبي جواب كلامي
بغيتك تصفي ذاك القلب لاين انا عبدك وانت الحاكمة
***
امولاتي افاطمة تحييني غير بالكلام
ما جاء رسول ما قلت لي كلمة ....واش ما في قلبك رحمة
يا اللي صلت بالحكمة وحبك ما...في وسط القلب زاد نار ضرامي
بردي الصهد الحامي....بالوصال والمصال لي في شفتك ذيك العذبية الناسمة
***
امولاتي امتى نشوف قدك يتمايس كعلام
منه الياس والريحان تعلم....الشعرغسيق مظلم
كغراب عليه مرصم وضياء عم
يلوح من الجبين نوره سامي...به كيزول غتامي
والحواجب نونين معرقين الشفار بغير مدام نايمة
***
امولاتي عينيك زوج كيسان من عتيق المدام
من ذاق منهم شي يصبح هايم ...والعطر في الخد مناعم
ورد عكري تحت صوارم فاح ناسم
والمعطس طير طار به منامي...بين الورود نسامي
والسنان احسن من حب الغمام...والجيد غزال خشى من الرما
***
امولاتي وانا دخيل جيدك جودي لي بالمرام
روض الرضا يفوح علي بنسيم...ساعة نرى وجهك الوسيم
افاطمة قبلي عبد خديم قالت الريم
قبلتك طول الحياة غلامي
لا تظن تبقى ظامي شق نهدي حتى نهدي كيوس فحضرتك تطفي حرقة الظما
***
امولاتي خدي نفرشو بالشوق لدوك القدام
ونقولك افاطمة زطمي ....يا لي داوتي جسمي
امري بالعز وحكمي ولا تحشمي
ونشوفك يا الباهية قدامي ..الرقيب بصره عامي
والحسود في غفلة وانا معاك تحت خيام الليل المخيمة
جات الميلا في راية الهشامي ....ناوية تزور رصامي
تلحفت بثياب رفيعة وجات تتمايل كلياسة الناعمة
منين نظرت زينها بنيامي ...قلت من صميم غرامي
كان هذي يقضة ولا منام عهدي بالشمس قبيل فالسماء
الساعة لاح نورها في رسامي ...كصورة الادامي
والخليلة تضحك حتى تطيح وتقول انا لغزال فاطمة
شكيت لها بليعتي وهيامي...هيبتي في جل مقامي
قلت لها حالي وسلمت خليلتي هي بلي كان عالمة
سال بريق الرحيق يا لوامي والنوامس والخوامي
غير حزت وقبلت ولا فعلت ما تصبح النفس به نادمة
هاك راوي رقايقي ونظامي ...فوق الحرير الشامي
هاك فن قليل مثيلو فجيلنا فاق بالبلاغة التامة
لاهل التسليم تنهيب سلامي واسمي فطرز ختامي
قول قال ادريس بن علي المالكي سلبتني الغزال فاطمة
Published by Said El Meftahi
-
dans
روائع من فن الملحون
13 juin 2009
6
13
/06
/juin
/2009
01:42
دمليج زهيرو صبيغ بالصفر كان فجيبي يا أهل الهوى ومشا ليا
باش نجاوب إلى تسال عنو تاج الغزلان
غاب زمان الهجرا وتاك بدري وهنا قلبي وراح من كل بليا
مهما زارت رسمي هلال عيدي راحت العيان
بتنا فحديث الحب والهوى وغزالي تهدي مدام كاس الحميا
واحنا فبساط رفيع لي صدركو عاشق فزمان
حتى راح الديجور والصباح تجلى ورمات فالشروق الذهبيا
وطيار الروض عالاغصان تنشد طبيع صبيهان
قالت مصباح الزين يا العاشق هذا وقت الرواح من غير خفيا
ودعتك فحفظ الكريم من لا تراه عيان
تطقت وقلت لبودلال خفت يطول الميعاد يالعذرا البهيا
ولا تسنانيا الريم وتخليني هيمان
جبدت ولفي دمليج من ايديها زين الشفرين روح لذاتي دميا
قالت ليا يا عاشق البها لا تبقى حيران
هاك الدمليج أعاشق المحاسن صونو وحضيه فالحجوب السريا
حتى نهدف ونزور مرسمك نصيبو محصان
ودعت هلال الزين تاج البها ورجعت من الفراق روحي مدهيا
وعملت فجيبي بالاشواق دمليج ضيا العيان
تم الدمليج مشى وطاح لي بقا عقلي كيهوم صبحان وعشيا
وانا لا حالة كيف حالتي في ضيو ديجان
دمليج زهيرو غاب مبان وبقيت من فراقو مهموم وحزين
ما تشاف مثيلو فيد سلطان عند العرب ولا فالهندوسين
دمليج لا يوجد فمكان فالروسيا ولا فخزين ستالين
دمليج الموضة يا فهيم من ذهب الصين وجا لتاج البنات هديا
صنعوا ماهر ذوقي لبيب وحكيم من اليونان
دمليج مرصع بالادرار من شغل الأناضول فيه حجرة تركيا
دارت بحجار الفوندو لا يدرك بثمن
دمليج لا مثلو وجد عند الملوك الفايتين في وطون أسيا
ولا في كندا ولا في أرض غموق السودان
دمليج ما وجد مثله في أرض الشام دون ريب وسوريا
ولا في القاهرة الصايلة ولا في عمان
دمليج الموضة ما وجد مثله عند اللي حايزين همة ومزيا
ولا دركوه اهل الاموال في الفرس وفرسان
دمليج الموضة ما يخلصو مال الأمريك والمدن الشرقيا
وكذ ا الكمال اسبانيا وغرناطة واشبيليان
مدت لي تاج الاريام هاذ الدمليج ولا عرفت كيف جرى بيا
وعملتو في جيبي وطاح لي ومشا يا الاخوان
طاح الدمليج وحار أمري وبقيت كنخمم فطيو ديجور
يعذر حالي من كان عذري ولا من بحالي جرحو معذور
سرت نفتش ونزاح صبري وانا كليح هايم والدمع يفور
درت في باب الخوخة مع الكنيف وحوز الكدام ما ارثا حد عليا
ورجعت على الصفاح كنسول دمعي هدان
ودخلت مع الاقواس والجزيرة خفيت العدوة مع عواز المخفيا
بوعجارو درتو على النهاية واكد عجلان
قطعت الواد وسرت للصفيفح وانا حالي كظيم ما صبت حميا
وطلعت علىراس الجنان سولت اهل الغيوان
فتشت على الدمليج يالفاهم في الدوح ولا جبرت من يصغى ليا
ودخلت على صلاج كنفتش وانا ولهان
ما صبت من اعطاني خبار ولا من شافو يا رجيح فأحضان صبيا
وبقيت على الدمليج كنسول سره يعلان
سولت على الدمليج الاريام وانا فغير حال وقلبي مصقوم
درت فدرب السراج بقوام والطالعة صغيرة فضيو ديموم
سولت بعرفي ناس الغرام وجميع من صبية فبنات اليوم
درت فدرب الحرة مع السياج على دمليجي سألت ولفي ثريا
قالت لي ما شفتو ولا جبرت خبارو فمكان
سول فالقطانين راك تجبر تما جمع الاريام عند العشويا
ومشيت وسلت اهل الهوى وليس يخبرني إنسان
قالولي سول يا عشيق في حومت البليدة إلى جبرتي ماريا
لعل تعطيك الخبار بالدمليج المصان
ومشيت البليدة ودرت درب الميتر وسألت كل من هي ذوقيا
وكذاك فناس الحب والذي شاخو فالهجران
ومشيت ودرت فالزنزفور وانا واله وحدي دمع العيان سخيا
والحفارين جميع درتها و فزقاقر الرمان
طال شقايا وهجرت المنام وانا كظيم هايم والعقل فليج
من حر الصهد فقدت المنام بين الضلوع جمري موقود سريج
و فنا جسمي يا صاح وسقام لا حال حالتي بفراق الدمليج
فتشت فبوعقدة على النهاية وزقاق اللي ما مشيتلو فصبحيا
ما صبت خبارو عند حد من كهول وشبان
وطلعت اليمن سريع راحت الشمس الاولى ديك الفوقيا
ولدرب بن عزاهم سرت كالح قلبي لهفان
ومشيت محزم يا فهيم فتشت احواز الطالعة ونهاري مكديا
فطريق السنيما لقاوني زوج بنات كران
شافوني ناس الحب كنسول قالو مالك روح ذاتك مهديا
قلت مشا لي دمليج من فراقو عقلي هيمان
قالت وحدا يا عاشق البها دمليجك موجود عند هيفا بركيا
لقاتو وقالت لي نهار كان يزور السلطان
طحت وبست الأرض قلت لها لاقيني بيه يا الريم العذريا
قالت دابا ياتيك بالوفا وهنا واطمئنان
قلت لها يا تاج البدور وين يكون الميعاد بينا دون خفيا
قالت يوم الجمعة الجاية تلقانا وكدان
أجينا لجنان السبيل قدام الصهريج الكبير وقت الذهبيا
تم رجانا ولاّ تصيبنا نرجاوك يعلان
رق الخاطر ونسيت الكدور ونكيت يا الفاهم جمع الحساد
وفرح قلبي ومشيت مبشور بقيت كنراجي شخص التماد
في يوم الجمعة قمت مسرور مشيت بالاشواق في وقت الميعاد
صبت بنات الغيوان كتراجيني في الموعد بجلالب فضيا
وشرابل من ذهب الشريق والتلثيمة حسن
قالو سهلا وميات مرحبا بالعاشق الغريم ليك بشرة وهنيا
بايعت وقلت على وصولهم تتفاجا الكدور
قالو ومشاو بزوج باللطافة جابو وحدا ثالثا تكون ثريا
قالو هذ العشيق صاحب الدمليج الفتان
قالت لي يا سودنت الدنجال دمليجك عندي دون ريب ولا شكيا
لكن لا تمشي لعندنا تصطاب الكيسان
قلت لها يا اعز البنات مالي قدرة حتى نخون بعد الولفيا
راقب فيا وجه الكريم نعم الحي المنان
مدت لي دمليجي وقلت ليها يجزيك بكل خير خالق البريا
قالت فالحين بلا جميل حشى مثلك يهان
ثم ودعت الباهيات وفرح قلبي ونسيت كل ما فات عليا
ولقاني بالدمليج رب الورى خالق الاكوان
دمليج الموضة جا ليدي واظفرت بيه وتفاجا كل احزان
وافرح قلبي ونسيت نكدي ورسلت له الوجيبة صبيغة الاشفار
راحت القلوب علال عيدي سلطانة الغوالي حرة البكار
وصلت رسمي تاج البدور زينة الاسم مكمولة البها الهواويا
صابت قلبي مسرور بالوصول وناشط فرحان
وانا محتال على وصولها من شوقي وجدت كل ما يزهى ليا
المقاعد والشليات جبتهم من الهندوسان
مهما جلست تاج الاريام ، نزلت انواع الطبخ والتفاكه وقتيا
كوكا كولا خلف الطعام شلّى نحكي بلسان
قالت مصباح الزين يا العاشق وين الدمليج قلت لضيا عنيا
دمليجك ودرتو وغاب عنّي ومشا ما بان
واحكيت لها يا صاح ما جرى لي وهلال الزين بارزة تصغى ليا
وانا قلبي مجروح فوق خدي دمعي هدان
قالت فهنا وريع، واعرف دمليجيا عشيق ما يبقى فيا
دمليج زهيرو صبيغ بالصفر كان فجيبي يا أهل الهوى ومشا ليا
باش نجاوب إلى تسال عنو تاج الغزلان
Published by Said El Meftahi
-
dans
روائع من فن الملحون
13 juin 2009
6
13
/06
/juin
/2009
01:32
أصاح زارني محبوبي يامس كنت صايم
شهدة قطعت و جنيت الورد قالو كليت رمضان
مهجور كنت مادا لي
يا حبيب الخاطر ياك المريض يفطر
الرعد زام طبلو من بعد كناطر الصمايم
والبرق سل سيفو ويخبل في خيول لمزان
والـــريح فــارس يشـالي
عن عكاب العلفات ع الوغا مشمر
القزاح شد بندو للفرجا عساكرو تلايم
وحرك بالمطار للبيدا حتى جرات ويدان
قــلبي بـــحبها ســالي
فج اصبح من ذاك الضبا مخضر
وبطايح النواور تضوّع منها نسايم
فصل اربيع هاذا ما كيفو في الزمان سلطان
وعلـــى اجــميع لقيـالي
عبقــري لابس منو دايرا موبر
مبسم الثنايا مشروح وجاد بالغرايم
الورد والزهر ع لطيار الناشدة اصبهان
فــرياض محتفل عالي
بين وردات النحلة شهـدها تعمر
من قلت الزيارة نتوهن ساخف لكوايم
معدوم بالجفا وحمولي مختالفة فالبدان
واليوم كيف يجرالي
الدوا قدامي ولا نطيق نصبر
الى يجودلي بالنظرة اللحظ لبها النايم
نزيدو على وداد الشهدة المجالسة بلامان
والغير ليس يزهالي
فالصفا عشقي حاشا فالمليح نهدر
حجة على هل الدعوة ما نصغى كلام لايم
قيس الزمان هذا يا من لا حاط بيه غيوان
فالزين ينشطن بالي
و الهوى من سيفوا دمي غزير يقطر
تارة تصيبني تايه ما بين لسواق هايم
تارة نغيب تارة نحضر حتى تقول سكران
فالحب هكذا حالي
غير سلم لي يا من لا بلاك و عذر
أما سهرت بهوايا و انت بالسرور نايم
أما بكيت ساعت نغتاض والقلب ليك صفوان
وما نهلت انجالي
و القليب مهيج و من لبكا مكدر
و أنا مشايخي بين قدامك لاحت لعمايم
لو كان كان قلبك نصراني لا غناه يليان
مفقود راحتي مالي
ياك تعرف حال المغروم ما ينهجر
عييت مانعزم مانفعات فالهوى عزايم
وبلا سباب غير نخمم و فكل ساع ديوان
بالطور بارت حيالي
كان عند المولى تدبيرنا مدبر
هذا شحال وانا قرصاني عايز لغنايم
واليوم ساعدو ريح صعيب على لوصال عوان
الهوى رماه لرمالي
رايس و على لغنيمة خرجوا يدور
رسى مخاطفو فالمرسى و تكلمو زرايم
خرجوا هل لمدينة قالوا هذا الرايس فلان
نادى سرورها فالي
في سواق الفرجات دخايري تشهر
قلبي كبير مشروح صغير الراس فالولايم
طبعي رقيق ما بين رباب الفن ليس يوهان
حتى نبر بخيالي
عاد يندم من كان فعيبنا مكثر
صافي من لعيوب ولانا شي صاحب لجرايم
عمري ما ننافق انسان و لا كليت رمضان
إلا شطارة شغالي
الكريم طلبتو فيما عصيت يغفر
لولا سماحتو جفني في بحر الذنوب عايم
بالسر و الجهر فبوابو نسعى العفو غفران
فالاولي مع التالي
الذنوب الفايت واللي عاد يصدر
أرافع السماوات جعلني للصلاح رايم
بدل سيئتي يالحسنى ولا نروم شيطان
ولا تخيب سالي
يا العالم بالقلب من الوزار طهر
أحافظ لقصيدة زيد الثقلة عل البهايم
واحضي عقود أهل الدعوات الناكرين لحسان
راني مقيد مقالي
سيف ماضي للداعي ما يصيب ينكر
في ضامة الشطارة كيف جرى لو يكون ضايم
رسيت فالسباعي وكلابو حاصلة فلركان
وبيادقي على التالي
بان غلبي من قال يمنعو ينظر
ترسان بربعة فيديا كنيتها رزايم
وضواصهم عندي مالا وكذاك زوج ليصان
والمال جاور شمالي
غير يخرج نطرق حين ما نوفر
عذرة مخنترة ظهرت بها للزهو علايم
كنيتها بعسل الشهدة فرياض بنسليمان
سقي البعض بمصالي
خذ هيفا للعاشق كاسها تعمر
وسلام ربنا للدهاة على الدوام دايم
بالورد والزهر والنسري ولقاح كل بستان
قد لعبير وغوالي
زيد مسك وجاوي وجميع ما تعطر
Published by Said El Meftahi
-
dans
روائع من فن الملحون
/fdata%2F2050774%2Favatar-blog-1050571789-tmpphpjHlSaS.jpeg){kind=avatar}
/fdata%2F2050774%2F%2Favatar-user-1360059-tmpphpO7Ne7J.png){kind=avatar}